.gif)
अमेरिकामा आज मध्यावधि निर्वाचन, ट्रम्पको शक्ति परीक्षण हुँदै
अमेरिकामा आज (नोभेम्बर ३) मध्यावधि निर्वाचन हुँदै छ । निर्वाचनमा अमेरिकी संसद्को तल्लो सदन हाउस अफ रिप्रेजेन्टेटिभ्सका सबै ४३५ र माथिल्लो सदन सिनेटका ३५ सिटका लागि प्रतिस्पर्धा हुँदै छ ।
अमेरिकामा राष्ट्रपति निर्वाचनको दुई वर्षपछि मध्यावधि निर्वाचन हुने गर्छ । यस निर्वाचनमा संसद्का सदस्यसँगै विभिन्न राज्यमा गभर्नरका लागि पनि मतदान हुँदै छ ।
हाल अमेरिकी कंग्रेसका दुवै सदनमा राष्ट्रपति डोनाल्ड ट्रम्पको रिपब्लिकन पार्टीको बहुमत छ । यसपटक रिपब्लिकनले कुनै एक सदनमा मात्रै बहुमत गुमाए पनि ट्रम्पलाई आफ्ना नीतिअनुसारका कानुन पारित गर्न कठिन हुनेछ ।
सिनेटमा बहुमतका लागि ५१ सिट आवश्यक
अमेरिकी सिनेटमा कुल १०० सिट छन् । हाल रिपब्लिकनसँग ५३ र डेमोक्र्याटिक पार्टीसँग ४५ सिट छन् । डेमोक्र्याटसँग दुई स्वतन्त्र सांसदको पनि समर्थन छ ।
यसपटक सिनेटका ३५ सिटका लागि मतदान हुँदै छ । बहुमत कायम गर्न रिपब्लिकनलाई आफ्नो पकड जोगाउनुपर्नेछ भने डेमोक्र्याटलाई बहुमत हासिल गर्न थप चार सिट जित्नुपर्नेछ ।
प्रतिनिधि सभाका सबै ४३५ सिटमा प्रतिस्पर्धा
प्रतिनिधि सभामा बहुमतका लागि २१८ सिट आवश्यक पर्छ । यसपटक सबै ४३५ सिटका लागि निर्वाचन हुँदै छ । त्यसैले दुवै दलबीच प्रतिनिधि सभाको बहुमतका लागि कडा प्रतिस्पर्धा हुने देखिएको छ ।
यो निर्वाचनलाई राष्ट्रपति ट्रम्पको लोकप्रियता र राजनीतिक प्रभावको परीक्षणका रूपमा पनि हेरिएको छ । रिपब्लिकनले दुवै सदनमा बहुमत कायम राख्न चाहेका छन् भने डेमोक्र्याटले दुवै सदनमा आफ्नो पकड स्थापित गर्ने लक्ष्य राखेका छन् ।
प्रतिकृया दिनुहोस