• सिनर्जी एफ एम ९१.६ मेघाहर्ज
• २०८३ असोज २२ बिहीबार

अमेरिकी राष्ट्रपति डोनाल्ड ट्रम्पले आफ्नो दोस्रो कार्यकाल सुरु भएयता आठवटा द्वन्द्व समाधान गरेकाले सन् २०२६ को नोबेल शान्ति पुरस्कार आफूले पाउनुपर्ने दाबी गरेका छन्।

बुधबार ओभल अफिसमा पत्रकारहरूसँग कुरा गर्दै ट्रम्पले आफूले अन्य नेताभन्दा शान्तिका लागि बढी काम गरेको दाबी गरे। उनले आठवटा युद्ध अन्त्य गराएको र विश्वलाई ठूलो संकटबाट जोगाउन भूमिका खेलेको बताए।

नोबेल शान्ति पुरस्कारको घोषणा शुक्रबार हुने उल्लेख गर्दै ट्रम्पले आफूले पुरस्कार पाए पनि नपाए पनि आफूले गरेका कामको महत्त्व कम नहुने बताए। नोबेल समितिले आफूजस्ता व्यक्तिलाई पुरस्कार नदिने छवि बनाएको टिप्पणीसमेत उनले गरे।

ट्रम्पले दोस्रो कार्यकाल सुरु गरेपछि आर्थिक दबाब, व्यापार रणनीति तथा कूटनीतिक पहलमार्फत विभिन्न देशलाई वार्तामा ल्याएको दाबी गर्दै आएका छन्। यद्यपि, केही क्षेत्रमा पुनः द्वन्द्व देखिएको तथा युक्रेनमा स्थायी शान्ति कायम हुन नसकेको भन्दै उनका दाबीमाथि प्रश्नसमेत उठाइएको छ।

यसअघि सन् २०२५ को नोबेल शान्ति पुरस्कार विजेता भेनेजुएलाकी विपक्षी नेतृ मारिया कोरिना मचाडोले आफ्नो पुरस्कारको पदक ट्रम्पलाई हस्तान्तरण गरेकी थिइन्।

सन् २०२६ को नोबेल शान्ति पुरस्कार नर्वेजियन नोबेल समितिले शुक्रबार घोषणा गर्ने कार्यक्रम छ।