महोत्तरी घटनामा प्रहरीको गोली लागेका न्यौपानेको मृत्यु

0

मंसिर ९ ,चितवन । महोत्तरीको बर्दिवासमा छ वर्षकी बालिकाको हत्याको विरोधमा भएको प्रदर्शनमा प्रहरीको गोली लागि घाइते भएका एक जनाको ज्यान गएको छ । हिजो भएको प्रदर्शनमा गोली लागेर घाइते भएका संजय भन्ने बुद्धिराज न्यौपानेको ज्यान गएको जिल्ला प्रहरी कार्यालय महोत्तरीले जनाको छ । गम्भीर घाइते भएका न्यौपानेलाई उपचारका लागि हेलिकोप्टरमार्फत काठमाण्डौको ग्राण्डी अस्पतालमा ल्याइएको थियो ।

अस्पतालमा उपचारको क्रममा राति ज्यान गएको परिवारले बताएका छन् । आइतबार बेलकीदेखि हराएकी बर्दिवास नगरपालिकाकी ६ वर्षीया बालिकाको सोमबार शव भेटिएको थियो । बालिकाको बलात्कारपछि हत्या भएको भन्दै दोषीलाई कारबाहीको माग गरेर स्थानीय बासिन्दाले हिजो पूर्वपश्चिम राजमार्ग बन्द गर्दै प्रदर्शन गरेका थिए । प्रदर्शनलाई रोक्न प्रहरीले दर्जनौँ राउण्ड अश्रुग्यासका साथै रबरका गोली र हवाइ फायरसमेत गरेको थियो । प्रहरीको गोली लागेर घाइते भएका अरु दुई जनाको उपचार भइरहेको छ । हत्याको आरोपमा पक्राउ परेका गौशाला नगरपालिका–५ का अरुण कुमार साहले बालिकाको हत्या गरेको स्वीकारेका प्रहरीले जनाएको छ ।

Share.

Leave A Reply