राष्ट्रपतिका लागि डेढ अर्बको हेलिकप्टर

0

काठमाण्डौं, भदौ २१ । राष्ट्रपतिसहित अति विशिष्ट व्यक्ति(भीभीआईपीलाई बोक्नका लागि सरकारले इटालीको निर्माण कम्पनी अगुस्ता वेस्टल्यान्डसँग अर्डर गरेको हेलिकप्टर आगामी मंसिरभित्र नेपाल ल्याउने तयारी गरिएको छ। एडब्लू १३९ हेलिकप्टर अधिकतम १५ सिट क्षमता र लगातार पाँच घन्टासम्म उडाउन सकिने जनाइएको छ। यस हेलिकप्टरको उडानका लागि नेपाल नागरिक उड्ड्यन प्राधिकरणका एक जना निरिक्षक पाइलट र नेपाली सेनाका तीन जना पाइलट हाल इटालीमा ‘टाइप कनभर्जन’ प्रशिक्षण गरिरहेका छन्। पाँच साता लामो प्रशिक्षणको केही अंश मलेसियामा पनि हुने छ। यहि हेलिकप्टरको उडानका लागि नेपाली सेनाका दुई जना इन्जिनियर र नागरिक उड्ड्यनका एक जना निरिक्षक इन्जिनियर पनि इटाली र अमेरिकामा प्रशिक्षण गरिरहेका छन्। अगुस्ता वेस्टल्यान्डसँग करिब दुई वर्षअघि नै हेलिकप्टर खरिद सम्झौता पाएको थियो। एउटा हेलिकप्टर गत मंसिरमा नेपाल ल्याइसकिएको छ। विपद् व्यवस्थापन र सेनाकै काममा मात्र यो प्रयोग भइरहेको अधिकारीहरु बताउँछन्। उच्च स्रोतका अनुसार इटालीबाट ल्याउन लागिएको पछिल्लो हेलिकप्टरको लागत करिब डेढ अर्ब रुपैयाँ छ। राष्ट्रपतिसहित अति विशिष्ट(भीभीआईपीहरुको भ्रमणका लागि यो प्रयोग हुने छ। स्रोतका अनुसार यो हेलिकप्टर नागरिक उड्ययन प्राधिकरणमा दर्ता भएर सेनाले चलाउने छ।
व्यवसायिक एयर अप्रेटरको अनुगमन र नियमन नागरिक उड्ययन प्राधिकरणले गर्दछ। यसमा पाइलटदेखि विमानसम्ममा प्राधिकरणले नियमित अनुगमन र नियमन गर्दछ। प्राधिकरणले निर्धारण गरेका मापदन्डलाई ती एयर अप्रेटरले अनिवार्य लागु गर्नुपर्दछ।
भीआईपी र भीभीआईपीलाई उडाउने सेनासँग चार वटा हेलिकप्टर रहेकामा दुई वटा गत वर्ष चिनलाई बेचिएको थियो। बाँकीमध्ये एउटा बिग्रिएर थन्किएको छ। एउटा भने सन्चालनमा रहेको छ। हेलिकप्टरतर्फ नेपाली सेनाको आफ्नै चार वटा एमआई, तीन वटा इक्विरल, एउटा वेल ४०७, २ वटा ल्यान्डसर र भारतले दिएको एउटा एएलएच ध्रुव छ। यसैगरि फिक्स ट्विन (हवाईजहाज)तर्फ एम२८ स्काई ट्रक र बीएन२त् आईल्यान्डर रहेको छ।

Share.

Leave A Reply