मकवानपुर,भदौ,३ ।
मकवानपुरको दुई ठाउँबाट प्रहरीले ठूलो परिमाणको लागुऔषध गाँजासहित पाँच जनालाई पक्राउ गरेको छ । राक्सीराङ गाउँपालिका वडा नम्बर ३, सरिखेत पलासे र हेटौंडा १५ रातोमाटेबाट प्रहरीले एक सय ३ केजी गाँजासहित पाँच जनालाई आज पक्राउ गरेको हो । पलासे बसपार्कबाट ८१ केजि ७६० ग्राम गाँजासहित १ जना पक्राउ परेका हुन् । गाँजासहित पक्राउ पर्नेमा सप्तरीको डाक्नेश्वरी गाउँपालिका वडा नम्बर ९ बस्ने ४० वर्षीय घुरन साहलाई रहेको जिल्ला प्रहरी कार्यालय मकवापनुरका प्रहरी उपरीक्षक मुकेश कुमार सिंंहले बताउनुभयो । यसैगरी रातोमाटेबाट कारमा राखेर निकासी गर्न लागिएको अवस्थामा २१ केजी ५ सय ग्राम गाँजा बरामद गरेको हो । कारसहित चार जनालाई नियन्त्रणमा लिइएको एसपी सिंहले जानकारी दिनुभयो । एच आर ५१ एल ५२४१ नम्बरको भारतीय कार र गाँजासहित भारतको मोतिहारी, नयाटोल बस्ने २५ वर्षीय कार चालक मुकेश सहनी, कारमा रहेका त्यसै ठाउँका २५ वर्षिय राज कुमार, मोतिहारी चिन्तामनपुरको हरीसिद्धि बस्ने ३५ वर्षीय ओम प्रकाश चौधरी र नेपालकै पर्सा जिल्लाको बिन्दवासिनी गाउँपालिका ५ बस्ने ५० वर्षीय जितेन्द्र प्रसाद यादवलाई पक्राउ गरिएको प्रहरीले जनाएको छ ।
