द्वन्द्वरत र असन्तुष्ट पक्षलाई वार्तामा आउन सरकारको आह्वान

0

भदौ, २५ ।
सरकारले नेत्रविक्रम चन्द नेतृत्वको नेपाल कम्युनिष्ट पार्टीलगायतका द्वन्द्वरत र असन्तुष्ट पक्षलाई वार्तामा आउन आह्वान गरेको छ । सरकारद्वारा गठित राजनीतिक वार्ता टोलीले असन्तुष्ट र द्वन्द्वरत पक्षलाई वार्तामा आउन औंपचारिक आग्रह गरेको हो । सोमबार सिंहदरबारमा पत्रकार सम्मेलन गरी वार्ता टोलीका संयोजक सोमप्रसाद पाण्डेयले असन्तुष्ट एवम् द्वन्द्वरत सम्पूर्ण पक्षलाई वार्तामा आउन आह्वान गर्नुभयो । उहाँले कुनै पनि असहमति, विवाद र द्वन्द्वलाई वार्ताकै माध्यामबाट टुंगो लगाउन सरकारले वार्ता टोली नै गठन गरेको पनि स्पष्ट पार्नु भयो । गएको भदौ ८ गते बसेको मन्त्रिपरिषद बैठकले द्वन्द्वरत र असन्तुष्ट पक्षलाई सहमतिमा ल्याउन सत्तारुढ नेकपा कम्युनिष्ट पार्टीका नेता पाण्डेयको नेतृत्वमा ५ सदस्यीय अधिकार सम्पन्न राजनीतिक वार्ता टोली गठन गरेको थियो । वार्ता टोलीले सिंहदरबार भित्रै कार्यालय स्थापना गरी आफ्नो कामलाई पनि सुरु गरेको छ । संयोजक पाण्डेयले गृह मन्त्रालयसँग समन्वय गरेर समितिले आफ्नो काम सुरु गरिसकेको जानकारी दिनुभयो । समितिले द्वन्द्वरत र असन्तुष्ट पक्षलाई पहिचान गर्न शान्ति प्रक्रियासँग सम्बन्धित विगतका समितिहरुसँग पनि आवश्यक परामर्श लिइसकेको छ ।

Share.

Leave A Reply