देवघाटमा बाँदर आतङ्क बढ्यो, नियन्त्रणका लागि पहल गर्न सरकारसँग माग

0

असोज २६,
पवित्र तीर्थस्थल देवघाटधाममा बाँदर आतङ्क बढेपछि नियन्त्रणका लागि पहल गरिदिन सरकारसँग माग गरिएको छ ।
बाँदरले मानिसलाई आक्रमण गर्ने, खाइरहेका कुरा खोसेर लगिदिने, घरभित्र पसेर पकाएको तथा भण्डारण गरेको खाना खाद्यान्न खाइदिने, पसलबाट किनेर ल्याउँदै गर्दा बाटोबाटै खोसेर लैजाने जस्ता समस्या बढेर गएपछि स्थानीयवासीले हैरानी व्यहोर्दै आएका छन् ।
देवघाट क्षेत्र विकास समितिका अध्यक्ष टंकनाथ पौडेलका अनुसार बाँदर आतङ्क साह्रै नै बढेर गएपछि वन मन्त्रालयमा नियन्त्रणका लागि आग्रह गरिएको छ । मन्त्रालयले देवघाट क्षेत्रमा पर्ने चितवन, नवलपरासी र तनहुँ जिल्लाका वन प्रमुखलाई बाँदर नियन्त्रण गर्न कसरी सकिन्छ भन्ने विषयमा रायसमेत मागेको पौडेलले बताउनुभयो ।
गलेश्वर आश्रम देवघाटका प्रबन्धक महेन्द्र प्याकुरेलका अनुसार वृद्धाश्रममा रहने र स्नानका लागि आउने भक्तजन बाँदरबाट निकै आतङ्कित बनेका छन् । कृषि तथा वन विज्ञान विश्वविद्यालय रामपुरका प्राध्यापक डा कृष्ण काफ्लेका अनुसार बाँदरको प्रजनन चारदेखि पाँच वर्षमा हुने गर्दछ । १६० दिनमा बच्चा जन्माउने गर्दछ । एक पटकमा प्रायः एउटा मात्रै बच्चा जन्माउने भए पनि पुनः छिट्टै गर्भाधारण गर्नाले यसको सङ्ख्या निकै छिटो वृद्धि हुने उहाँले बताउनुभयो ।

Share.

Leave A Reply